Policët e Gjenevës përfundojnë grevën

Këshilli i Qytetit i Gjenevës ka marrë angazhime për përmirësimin e kushteve të policëve si dhe ka ofruar propozime të pranueshme

Policët e Gjenevës sërish do të fillojnë të rruhen! Rreth tri javë ata kanë protestuar, veç tjerash edhe duke mos u rruar, duke kundërshtuar përkeqësimin e kushteve të tyre të punës.

Ata po ashtu gjatë kësaj kohe nuk kanë bërë as dhënien e gjobave në trafik.

Të enjten (dje) sindikata e Policisë ka vendosur që të gjitha aksionet në këtë drejtim t`i përfundojë deri të shtunën, shkruan portali i televizionit Publik Zviceran SF1.  

Këshilli i Qytetit i Gjenevës ka marrë angazhime për përmirësimin e kushteve të policëve si dhe ka ofruar propozime të pranueshme, thuhet në një komunikatë të sindikatës.

Siç është shkruar tashmë, duke filluar nga 17 shkurti, policët e Gjenevës kanë kryer shërbimin e tyre pa bartur uniforma, pastaj nuk janë rruar dhe nuk kanë shpërndarë gjoba. Këtë e kishin bërë në shenjë proteste.

Ata ndjeheshin se nuk gëzonin respektin e duhur nga Qeveria kantonale  dhe ishin ankuar për ngarkesë të madhe me punë administrative.