Nënë e djalë humbin jetën nga zjarri

Bëhet fjalë për një grua 51 vjeçe dhe të birin e saj, 21 vjeçar, të cilët jetonin bashkë në këtë shtëpi. Ata janë gjetur të vdekur në shtëpi nga ekipi shpëtimtar

Dy persona kanë humbur jetën nga një zjarr që ka shpërthyer në një shtëpi në Sursee (Kantoni i Lucernit) natën e mbrëmshme, bën të ditur agjencia zvicerane e lajmeve sda. Bëhet fjalë për një grua 51 vjeçe dhe të birin e saj, 21 vjeçar, të cilët jetonin bashkë në këtë shtëpi, transmeton albinfo.ch. Ata janë gjetur të vdekur në shtëpi nga ekipi shpëtimtar.

Sipas njoftimeve që jep policia edhe katër banorë të tjerë të shtëpisë si dhe tre zjarrfikës janë dërguar në spital me dyshimin se janë helmuar nga gazi që është liruar përmes tymit  pas shpërthimit të zjarrit.

Në aksionin e shpëtimit dhe të fikjes së zjarrit kanë qenë të pranishëm gjithsej 90 pjesëtarë të zjarrfikësve, shpëtimtarëve dhe të policisë.

Ende nuk ka njohuri rreth shkaqeve të zjarrit. Tash për tash nuk ka dëshmi për ndonjë zjarrvënies të qëllimtë.

Shtëpia ku ka ndodhur zjarri është e pabanueshme. Të gjithë banorët e saj janë strehuar në shtëpi të tjera.