Tahiri harmonizon me ndërmjetësin Cooper agjendën për dialogun

Zëvendëskryeministrja Tahiri është takuar sot në Prishtinë me ndërmjetësin e bisedimeve Kosovës- Serbi, Robert Cooper, këshilltarin e lartë përfaqësueses së lartë e BE-së për Politikë të Jashtme dhe Siguri, Catherine Ashton.

Në takim është harmonizuar ecuria e procesit të dialogut për çështje praktike midis Kosovës dhe Serbisë dhe përgatitjet për takimin e radhës që do të mbahet nga fundi i marsit në Bruksel. Bashkëbiseduesit u dakorduar  që të vazhdohen konsultimet për finalizimin e agjendës dhe për mbarëvajtjen e procesit të dialogut.

Zëvendëskryeministrja Tahiri është takuar edhe me drejtorin për Ballkanin në Grupin Ndërkombëtar të Krizave (ICG), Marko Prelec, ku kanë biseduar lidhur me raportin e fundit që ICG-ja ka bërë për Kosovën. Tahiri ka thënë se, pas analizimit me kujdes të raportit për Kosovën të ICG-së, Qeveria e Kosovës konsideron se çfarëdo propozimi për autonomi është i papranueshëm dhe joreal dhe në kundërshtim me Kushtetutën e Republikës së Kosovës.

Ndërkohë kryeministri Hashim Thaçi ka përsëritur sot se dialogu i filluar ndërmjet Serbisë dhe Kosovës në Bruksel, do ketë përfundime pozitive. “Me mbështetje të plotë të SHBA-ve e BE-së dhe me qëndrimet korrekte e konstruktive të Kosovës dhe Serbisë, ky proces do të përmbyllet me njohjen reciproke dhe anëtarësim në NATO dhe BE-së”, ka thënë kryeministri.Sipas Thaçit, në këtë çështje do të punohet në përputhje të plotë me Kushtetutën e Kosovës dhe Pakon e Ahtisaarit.

Ndërsa, duke iu referuar disa deklaratave të fundit të ICG-së se për veriun e Kosovës duhet të ketë një status të veçantë, kryeministri Thaçi ka theksuar se “çdo deklarim i kujtdo qoftë, qoftë politik apo akademik, që del në kundërshtim me Kushtetutën e Kosovës dhe dokumentin e presidentit Ahtisaari, do të ikë si flluskë sapuni”.