Kështu e festuan shqiptarët e Zvicrës fitoren e Kombëtares

Si kudo ku jetojnë shqiptarë, në vendet e tyre në Ballkan ashtu dhe në diasporë, u festua me shumë entuziazëm fitorja e parë e Kombëtares Shqiptare në Evropianin 2016.
Me qindra automjete të stolisura me flamuj kombëtarë, duke aktivizuar sirenat kanë parakaluar rrugëve të qyteteve të ndryshme të Zvicrës. Kamera e albinfo.ch ka regjistruar pamje të kësaj shprehjeje të gëzimit me fitoren në qytetin Winterthur të Kantonit të Cyrihut.

Kolona të gjata të veturave kanë qarkulluar më gjatë se një orë nëpër rrugët e këtij qyteti, që nga momenti i fishkëllimës që ka dhënë shenjën e përfundimit të ndeshjes Shqipëri – Rumani, gjegjësisht nga çasti i fitores historike të kombëtares.

Djem e vajza që valvisnin flamujt shqiptarë, aty këtu edhe zviceranë, janë bërë pjesë e dalldisë kolektive duke skanduar slloganet e njohura dhe duke vallëzuar nën ritmet e këngëve kushtuar fitores.
Festuesve shqiptarë u janë bashkuar vende-vende edhe ata zviceranë, por më të pakët në numër. Ata kanë valvitur flamujt e tyre duke i bashkuar me ata dykrenorë të tifozëve shqiptarë.

Policia ka qëndruar në rrugë duke mbikëqyrur rrjedhën e festimi por pa bërë ndonjë ndërhyrje pasi që festa ka rrjedhur pa incidente, përveç pengimit të trafikut nga shkaku i zënies së rrugëve.