“Një lule për Jasharajt”, fillojnë „Ditët e Diasporës” në Prekaz

Në Prekaz të Skenderajt të hënën mbrëma u mbajt manifestimi tradicional “Ditët e Diasporës”, i cili këtë vit u hap me aktivitetin “Një lule për Jasharajt”.

Një grup bashkatdhetarësh dhe qytetarësh të tjerë, të prirë nga ministri i Diasporës në Qeverinë e Kosovës, Valon Murati, fillimisht kanë bërë homazhe në varrezat e Jasharajve.

Me këtë rast, ministri Murati tha se Prekazi dhe sakrifica e Jasharajve për liri, janë vlera universale, andaj i takojnë mbarë botës dhe njerëzimit.

“Edhe këtë vit po mblidhemi në Prekaz për të nderuar sakrificën e familjes Jashari, sakrificë që shënjojë një prej momenteve më të përpjekjeve të popullit shqiptar për liri”, tha Murati. Gjatë fjalës e tij ministri i Diasporës shtoi se edhe pse Kosova vend i vogël, shumë vende që e kanë të zhvilluar turizmin, e kanë lakmi fal diasporës.

“Tërë muajt e verës, realisht janë të diasporës. Ne si ministri, së bashku edhe me institucionet tjera po përpiqemi që t’u shërbejmë këtyre njerëzve po e gjallërojnë çdo cep të Kosovës”, tha ministri Murati, përcjell albinfo.ch.

Më pas orkestra “Spartiti per Scutari”,  me artistë arbëreshë të Italisë, ka mbajtur një koncert drejtuar  nga kompozitori shkodran, Bardh Jakova.

Ndryshe, reshjet e shiut, problemet teknike dhe pjesëmarrjes së ulët, kanë bërë që këtë vit manifestimi “Ditët e Diasporës” të mos e këtë shkëlqimin e viteve të mëparshme.

“Ditët e diasporës” me shumë aktivitete kulturore dhe sportive po shënohet pothuajse nëpër të gjitha komunat e Kosovës, ndërkaq nata përmbyllëse mbahet sonte (e martë 2gusht) me një aktivitet të veçantë në Prishtinë.