Zvicra i jep Shqipërisë 1.25 milion euro për përmirësimin e raportimit financiar

Fondi do të shërbej për të krijuar një ambient biznesi transparent dhe me institucione funksionale

Sekretariati Shtetëror për Çështje Ekonomike (SECO) i ka dhënë Shqipërisë një grand me vlerë 1.25 milion euro, i cili do të shërbej për të krijuar një ambient biznesi sa më  transparent, me institucionet funksionale, që do të sigurojnë standarte të larta të raportimit financiar, në përputhje me praktikat më të mira ndërkombëtare dhe me direktivat e BE-së.

Projekti do të zbatohet nga Ministria e Financave në bashkëpunim me Bankën Botërore dhe përfituesit e tij do të jenë Ministria e Financave, Instituti i Ekspertëve Kontabël, Këshilli Kombëtar i Kontabilitetit, Bordi i Mbikqyrjes së Ekspertëve, Audituesve dhe Universitetet.

“Projekti do të implementohet nga Ministria e Financave nën mbikqyrjen e Bankës Botërore (Qendrës për Raportimin Financiar në Vienë), pra gjithçka do të monitorohet në përputhje me procedurat e Bankës Botërore”, pohoi zëvëndësministri i Financave, Nezir Haldeda.

Nga ana tjetër, zëvëndësministri i Financave pranoi se raportimi financiar i shoqërive ka mjaft probleme, ndërsa vlerësoi se SECO është një ndër kontribuesit më të rëndësishëm në Shqipëri për reformat në përmirësimin e ambjentit ekonomik të biznesit dhe fuqizimit të institucioneve e reformave të rëndësishme.

“Të gjithë jemi të ndërgjegjshëm që profesioni i kontabilistit dhe i audituesit, dhe raportimi i shoqërive në vend kanë probleme të rëndësishme. Të tilla probleme korrigjohen në mënyrë të qëndrueshme përmes reformës, duke parë të vërtetën në sy, tek secili prej nesh, dhe duke krijuar bindjen se rruga e vetme është reformimi dhe arritja, në frymë dhe në germë, e standardeve ndërkombëtare”, theksoi Haldeda.

Plani i veprimit parashikon aktivitete të grupuara në tre faza dhe do të zgjasë 8-10 vjet. Qëllimet kryesore të tij janë: Përmirësimi i bazës ligjore, mbështetja e procesit të vendosjes së standarteve të raportimit financiar, përmirësimi i proçesit të auditimit dhe mbikqyrja publike e auditoreve.