Rrihet aktivisti i Vetëvendosjes, Frashër Krasniqi

Sigurimi i Kolegjit AAB-Riinvest ka rrahur Krasniqin pasi ai ka pyetur Thaçin nëse "i ka hipur skijave"

Aktivisti i lëvizjes Vetëvendosje, Frashër Krasniqi, është rrahur nga sigurimi i kolegjit AAB-Rinvest pasi ata kanë vlerësuar se ai ka fyer kryeministrin Thaçi. Ngjarja ka ndodhur kur kryeministri i Kosovës që po mbante një ligjëratë në Kolegjin AAB–Riinvest teksa ka prezantuar planin ekonomik të Qeverisë, është pyetur nëse “i ka hipur skijave” gjersa ka hartuar këtë plan.

Fillimisht ai nuk ka dashur t`i përgjigjet pyetjeve të Frashër Krasniqit i cili për këtë pyetje është grushtuar dhe shkelmuar nga sigurimi. Me urdhër të Ministrit të Arsimit, Ramë Buja, Krasniqi që është aktivist i Vetëvendosjes është nxjerrë me dhunë nga amfiteatri i këtij Kolegji.

Pas kësaj kryeministri me cinizëm ka nisur tu përgjigjet pyetjeve duke thënë se as universitetet nuk mund të edukojnë ata që u mungon edukata në familje.

Ndërsa ka thënë se plani që prezantoi ka qenë i përpiluar qysh para fushatës dhe që ai është njëri i fjalës duke aluduar në rritjen pagave.

Fakulteti AAB-Riinvest pas këtij incidenti ka dalë me një komunikatë për media, ku është distancuar nga ky rast.

“Universiteti AAB-Riinvest njofton opinionin publik se gjatë ligjëratës së kryeministrit Hashim Thaçi para studentëve dhe auditorit të tij, disa persona të pandërgjegjshëm të cilët deshën të prezantohen si studentë të këtij Universiteti dhe shpërndanë pamflete për auditorin nuk janë studentë të Universitetit tonë. Universiteti AAB-Riinvest shpreh keqardhje dhe distancohet publikisht nga sjelljet dhe veprimet e tyre”, thuhet në komunikatë.