Hyka vazhdon të shkëlqejë

Mesfushori shqiptar, Jahmir Hyka, kësaj radhe ka asistuar një herë në fitoren e Luzernit 3:0 ndaj Thun-it

Jahmir Hyka është në top-formë. Ai po shkëlqen në skuadrën zvicerane Luzern, derisa është ftuar edhe nga Gianni De Biasi në Kombëtaren shqiptare, shkruan albinfo.ch.

Në takimin e fundit, të fituar me shifrat 3:0 ndaj Thun-it, Hyka ishte si zakonisht titullar i paprekshëm te Luzerni, duke u treguar i rrezikshëm sa herë që prekte topin. Lojtari shqiptar mori një goditje, por vazhdoi të qëndronte në fushë, duke qenë vendimtar në minutën e 53-të, pasi dha asistin për golin e dytë të ekipit të tij, të realizuar nga Shneuli.

Me rezultatin thuajse të siguruar, në minutën e 80-të, trajneri Ryan Babel vendosi që të largonte nga fusha futbollistin shqiptar, për të mos rrezikuar përkeqësimin e situatës së tij pas goditjes së marrë, mes duartrokitjeve të zjarrta të rreth 10 mijë tifozëve të pranishëm në stadium.

Një atmosferë e tillë dhe një numër kaq i lartë tifozësh për standardet e kampionatit zviceran është edhe meritë e faktit se kjo ishte fitorja e katërt në pesë ndeshjet e para për ekipin e Luzernës, nisja më e mirë e kampionatit në historinë e klubit.

Skuadra e Hykës gjendet 3 pikë pas Baselit kryesues dhe duhet theksuar se humbjen e vetme deri tani e ka regjistruar pikërisht përballë kampionëve në fuqi, në një ndeshje të mbyllur me rezultatin 3:2 dhe ku Hyka ishte autori i të dy golave për skuadrën e tij.