Lunacek, kandidate për kryediplomate të BE-së në Kosovë

Lunacek është kandidate e BE-së për të zëvendësuar diplomatin holandez, Pieter Feith në postin e përfaqësuesit të BE-së në Kosovë.

Ulrike Lunacek, politikane e Partisë së Gjelbër të Austrisë, e cila aktualisht është raportuese e Parlamentit Evropian për Kosovën, është kandidate e BE-së për të zëvendësuar diplomatin holandez, Pieter Feith në postin e përfaqësuesit të posaçëm të BE-së në Kosovë.

 Feith, deri më tani,  ka qenë shef i Zyrës Civile Ndërkombëtare (ICO), e cila është marrë me mbikëqyrjen e zbatimit të planit të ish-emisarit të OKB-së, Martti Ahtisaari për pavarësinë e Kosovës. Feith e ka përfaqësuar BE-në në Kosovë, por në të ardhmen ai do të mbesë vetëm shef i ICO-së me mandat të pakufizuar, ndërsa praninë e BE-së në Kosovë do ta drejtojë një përfaqësues tjetër.

 Burime të Kohës Ditore në Bruksel kanë bërë të ditur në kushte anonimiteti se si kandidate për postin e përfaqësuesit të posaçëm të BE-së në Prishtinë ka kandiduar Ulrike Lunacekun. Mësohet se kandidatura e Lunacekut është pritur mirë edhe nga kryediplomatja e BE-së, Catherine Ashton.

 Supozohet se deri në zgjedhjen përfundimtare të përfaqësuesit të posaçëm të BE-së për Kosovën, këtë funksion përkohësisht do ta ushtrojë diplomati italian Fernando Gentilinni, i cili ka shërbyer në Kosovë në vitet 2004-2005.

 Afati për kandidim për postin e përfaqësuesit të BE-së në Kosovë skadon më 29 prill.

 Burime të BE-së parashikojnë se Gentilinni do të qëndrojë rreth tre muaj në Kosovë, pastaj këtë post do ta merrte ose Lunacek, nëse zgjidhet, apo ndonjë kandidat tjetër.

 Brukseli synon të organizojë më mirë praninë e BE-së në Kosovë. Përfaqësuesi special do të jetë funksionari kyç i BE-së që do ta përcjellë procesin e integrimit të Republikës së Kosovës.

 Deri më tani BE-ja ka qenë e përfaqësuar në Kosovë nga Pieter Feith dhe nga diplomati italian Renzo Daviddi, i cili ka qenë shef i Zyrës Ndërlidhëse të Komisionit Evropian.