AAK:Ministria e Diasporës për hir të pazareve të koalicionit

Jahja Lluka nga AAK-ja ka kritikuar se po themelohet ky resor vetëm për pazare politike por jo edhe për mërgimtarët

Zyrtarë të Partisë opozitare, Aleanca për Ardhmërinë e Kosovës, kanë deklaruar të premten në Prishtinë se më në fund koalicioni qeverisës pranoi një nismë të tyre, për themelimin e Ministrisë së Diasporës, që sipas tyre është nevojë e kahmotshme kjo për t’ua mundësuar mërgimtarëve që të jenë më afër vendlindjes.

Jahja Lluka nga AAK-ja, në një konferencë për gazetarë tha se subjekti i tij politik e mori këtë iniciativë dhe e kishte në programin e vet politik që të themelojë këtë resor shumë të rëndësishëm.

Por ai ka kritikuar koalicionin qeverisës duke theksuar se po e themelon këtë resor vetëm për pazare politike por jo edhe për mërgimtarët.

“AAK kërkon nga ministria në krijim, që të mos mbetet në margjina të këtyre pazareve, por ta kryejë punën e saj, për të cilin është e thirrur, duke qëndruar afër mërgimtarëve tanë, që t’ua lehtësojë atyre jetën në mërgim dhe t’ua mundësojë që nevojat e tyre t’i kryejnë sa më mirë dhe sa më lehtë”, tha Lluka.

.

Po ashtu AAK-ja ka kërkuar se me ndryshimin e Kushtetutës së Republikës së Kosovës dhe Ligjit Zgjedhor, diaspora të ketë vende të rezervuara në Kuvendin e Republikës së Kosovës, për t’i përfaqësuar mërgimtarët që janë të shumtë në tërë botën.