Sulmohet me bombë shtëpia e drejtorit të RTK-së

Mjeti shpërthyes është gjuajtur mbrapa shtëpisë dhe policia ka dal në vendin e ngjarjes, duke kryer hetimet. Ky është sulmi i dytë ndaj RTK-së, pas atij që ndodhi para disa dite në objektin e RTK-së

Situata e sigurisë në Kosovë vazhdon të mbetet shumë e tensionuar. Mbrëmë persona të panjohur kanë gjuajtur një bombë dore para shtëpisë së drejtorit të përgjithshëm të Radio Televizionit të Kosovës (RTK), Mentor Shala. Sulmi ka ndodhur rreth orës 22:10 minuta, në kohën kur në shtëpi kanë qenë familja e tij.

Shpërthimi ka shqetësuar familjen Shala dhe fqinjët përreth. Mjeti shpërthyes është gjuajtur mbrapa shtëpisë dhe policia ka dal në vendin e ngjarjes, duke kryer hetimet. Ky është sulmi i dytë ndaj RTK-së, pas atij që ndodhi para disa dite në objektin e RTK-së, ku me granatë dore u sulmua objekti.

Sulmin e ka konfirmuar edhe Drejtori i RTK-së Mentor Shala. Ai ka thënë se shtëpia e tij në Matiqan është sulmuar me një mjet shpërthyes e që supozohet të jetë bombë dore.

Sipas tij shpërthimi ka qenë i fuqishëm, ndërsa bomba është gjuajtur prapa shtëpisë.

“Shpërthimi ka qenë i fuqishëm, që ka tronditur tërë lagjen. Mjeti shpërthyes është hedhur prapa shtëpisë sime. Në shtëpi kemi qenë e gjithë familja. Fatmirësisht nga ky shpërthim askush nuk është lënduar”, tha Shala, citon RTK.

Ai po ashtu konfirmoi se Policia ka gjetur siguresën e mjetit shpërthyes për të cilin ende nuk ka konfirmim zyrtar se për çfarë mjeti bëhet fjalë.

I menjëhershëm ka qenë reagimi i Asociacionit të Gazetarëve të Kosovës.

“Ky sulm është një veprim kriminal për të cilin autorët duhet t’i nënshtrohen përgjegjësisë penale. AGK kërkon nga institucionet, përkatësisht Policia e Kosovës dhe Prokuroria që të hetojnë këtë rast i cili është vazhdimësi e sulmeve ndaj gazetarëve dhe mediave. Sulmet kanë për qëllim frikësimin e gazetarëve në Kosovë, posaçërisht atyre që punojnë në televizionin publik”, thuhet në reagim.

AGK kërkon nga organet e drejtësisë, që jo vetëm këtë rast por edhe rasti i hedhjes së granatës së dorës në RTK, të hetohen me prioritet. “Gazetarët janë të dëshpëruar me qasjen e institucioneve në hetimin e rasteve që për objekt trajtimi kanë gazetarët”, thuhet në reagim.