Pacolli “barazohet” me Jahjagën dhe Thaçin

Ai i ka përshkruar të tjera detyra vetes nga ato që parasheh Rregullorja dhe do të angazhojë staf përtej asaj çfarë lejon kjo rregullore

Behgjet Pacolli nuk ka përfilluar fushëveprimin e tij si kryeministër të paraparë në Rregulloren për fushat e përgjegjësisë administrative, të Zyrës së kryeministrit, të cilën e ka nxjerrë Qeveria.

Por, ai ia ka përshkruar të tjera detyra vetes nga ato që parasheh Rregullorja dhe do të angazhojë staf përtej asaj çfarë përcakton kjo rregullore. Se çfarë do të bëjë në cilësinë e zëvendëskryeministrit, Pacolli në detaje i ka listuar kompetencat në një dokument që e ka emërtuar “Memorandum përshkrues për angazhimin e zëvendëskryeministrit të parë të Kosovës”.

Në një kopje të siguruar nga Koha Ditore shihet rol i madh i Pacollit në adresimin e çështjeve në fushën e diplomacisë dhe të ekonomisë.

“Zëvendëskryeministri i parë i Kosovës, Behgjet Pacolli duhet të përfshihet në protokollin e takimeve me zyrtarë të lartë, presidentë, kryeministra, ministra të jashtëm, të industrisë, ekonomisë, etj., që vizitojnë Kosovën, krahas takimeve me presidentin dhe kryeministrin e Kosovës”, thuhet në përshkrimin e kompetencave që ia ka parashkruar vetes Behgjet Pacolli, të cilat kanë marrë bekimin e kryeministrit Hashim Thaçi.

Pacolli është zgjedhur zëvendëskryeministër kohë më parë, pasi atë e rrëzoi nga posti i presidentit Gjykata Kushtetuese për mënyrën e zgjedhjes në Kuvend.