Skandaloze: Skënderbeu kurdisi 50 ndeshje

Skuadra shqiptare përveç që është dënuar me 1 vjet mospjesëmarrje në Ligën e Kampionëve, mësohet se ka kurdisur edhe 50 ndeshje

Skandalet për Skënderbeun nuk kanë përfunduar. UEFA ka publikuar së fundmi emra zyrtarësh të këtij klubi të cilët pas hetimeve të bëra kanë rezultuar të lidhur me kompanitë e basteve, shkruan albinfo.ch.

Në raportin e Inspektorëve të Komisionit të Disiplinës dhe Etikës në UEFA, thuhet se gjatë viteve të fundit Skënderbeu ka manipuluar mbi 50 ndeshje ndërkohë që bie në sy dhe emri i ish-ministrit të Financave dhe financuesit të klubit korçar, Rivdan Bode, i cili së bashku me presidentin aktual, Ardijan Takaj dhe ish-presidentin Agim Zeqo, janë personat kryesorë të klubit të lidhur me bastet.

Në raportin e Inspektorëve të UEFA-s shkruhet se Skënderbeu ka qenë i përfshirë në mënyrë të vazhdueshme në veprimtarinë e fiksimit të ndeshjeve kombëtare dhe ndërkombëtare gjatë gjashtë viteve të fundit. Janë mbi 50 ndeshje të manipuluara nga Skënderbeu mes të cilave 5 nga Liga e Kampionëve, dy nga Liga e Evropës, 41 Superliga e Kupa e Shqipërisë dhe gjashtë ndeshje miqësore.

“Sistemi i Detektimit të Mashtrimeve të Basteve, me saktësi ka konfirmuar para panelit se klubi Skënderbeu ka qenë i përfshirë vazhdimisht në aktivitete manipulimesh rezultatesh në ndeshje kombëtare dhe ndërkombëtare në 6 vitet e fundit. Sistemi arrin në konkluzionin se të paktën numri në vijim i ndeshjeve është manipuluar për qëllime fitimit të paligjshëm nëpërmjet basteve: 5 ndeshje të Ligës së Kampioneve, 2 ndeshje të Europa League, 41 ndeshje të Kampionatit Shqiptar dhe Kupës së Shqipërisë si dhe 6 ndeshje miqësore”, shkruhet ndër të tjera në argumentimin e UEFA-s.