Gjermania, e pasur me fëmijë të varfër

Në Gjermani po rritet numri i fëmijëve të varfër. Kështu thuhet në studimin aktual të Fondacionit “Bertelsmann”. Rreth dy milionë fëmijë në Gjermani sot jetojnë në familje që varen nga ndihma sociale, që është më shumë se 5 vjet më parë. Të varfërit janë ata fëmijë, prindërit e të cilëve janë të papunë dhe marrin mbështetje nga shteti, shkruan albinfo.ch.

“Fëmijët duhet të heqin dorë nga shumë gjëra”, tha Annette Stein, një eksperte për politikën e familjes në Fondacionin “Bertelsmann”, përcjell albinfo.ch. Mohimi fillon në shtëpi: fëmijët e varfër shpesh nuk kanë dhomën e tyre, dhe për këtë arsye ata nuk kanë një vend ku mund t’i kryejnë detyrat e shtëpisë. Ata janë të ushqyer keq, në vend të frutave dhe perimeve, shpesh në menynë e tyre marrin ushqim të shpejtë. Fëmijët nga familjet e varfra janë shpesh të izoluar nga shoqëria, nuk kanë para për udhëtime shkollore, shoqatat sportive apo mësimet e muzikës. E gjithë kjo ndikon dhe për një shkollim të keq. Fëmijët nga familjet në asistencë sociale që arrijnë nëpër universitet përbëjnë një përjashtim.

Studimi tregon se në përgjithësi në Gjermaninë jugore rreziku i varfërisë është shumë më i ulët se në zonat më pak të zhvilluara industriale.

Një fakt tjetër, pothuajse çdo i pesti fëmijë në Gjermaninë Lindore rritet në varfëri. Rekord ka shënuar Berlini. Pothuajse çdo i treti fëmijë në kryeqytet rritet në kushte të këqija. Fillim dukshëm më të mirë në jetën e tyre kanë fëmijë që jetojnë në Bavari apo Baden Württemberg, ku nga varfëria është prekur çdo i dhjeti fëmijë.