Kapet në Shqipëri personi që kishte qëlluar policin gjerman para 32 vitesh!

Personi që sot është 58 vjeçar, nga fillimi i vitit 2016 ishte në fokus të kërkimeve të policisë gjermane, e cila i kishte shenjat e gishtërinjve të dorasit.

Në qershor të vitit të largët, 1984 një person atëbotë 26 vjeçar nga Kosova kishte qëlluar me revole një polic gjerman në Hannover. Kjo kishte ndodhur pasi që ai, vet i dyti, kishte sulmuar një shitore të mjeteve të lundrimit ndërsa polici që banonte mbi atë shitore, kishte ndërhyrë. Me atë rast ai kishte pësuar plagë të rënda.

Prej atëherë dorasit i kishte humbur çdo gjurmë, për t`u gjetur sërish pas 32 viteve, në Tiranë, Shqipëri.

Kështu, siç shkruan Hannoversche Allgemeine, personi që sot është 58 vjeçar, nga fillimi i vitit 2016 ishte në fokus të kërkimeve të policisë gjermane, e cila i kishte shenjat e gishtërinjve të dorasit. Në hetime është përfshirë edhe europoli, transmeton albinfo.ch. E gjithë kjo u realizua në  bashkëpunim me policitë e Monakos, Kosovës, Maqedonisë dhe së fundi, edhe të Shqipërisë, ku operacioni u përmbyll me sukses.

Shtetësia e dorasit nuk përmendet por, në bazë të përshkrimit të rrethanave dhe vendeve ku ai ka frekuentuar, ai duhet të jetë kosovar

Prokuroria Shtetërore e Hanoverit tash synon ekstradimin e personit të fjalë nga shteti shqiptar.

Krahas tij, në sulmin e bërë në vitin 1984 kishte marrë pjesë edhe një person 19 vjeçar. Ai ishte kapur dhe dënuar me tre vjet burg për të rinj.