Kosova duhet të ketë institut të diasporës

Albin Kurti ka kërkuar sot krijimin e një instituti kombëtar të diasporës

Lideri i Lëvizjes Vetëvendosje, Albin Kurti, në cilësinë e kryesuesit të Komisioni parlamentar për punë të jashtme të Kuvendit të Kosovës ka kërkuar sot krijimin e një instituti kombëtar të diasporës bashkë me Shqipërinë dhe Maqedoninë.

Në arsyetimin për krijimin e këtij instituti, Kurti ka thënë se me këtë do të krijohej një përkujdesje më të mirë ndaj diasporës dhe mërgatës shqiptare, e cila në vendet Perëndimore është e organizuar në baza nacionale, në funksion të ruajtjes më të mirë identitetit kombëtar të saj. Sipas Kurtit, është obligim i institucionet shtetërore të Kosovës dhe të vendeve të rajonit nga kanë migruar shqiptarët.

Ai ka përmendur edhe kontributin e mërgimtarëve shqiptarë për zhvillimin ekonomik të Kosovës, të Shqipërisë e të vendeve të tjera të rajoni si dhe kontributin e tyre për mbështetjen e luftës çlirimtare në Kosovë.

Gjatë debatit të anëtare të Komisionit parlamentar për punë të jashtme janë pajtuar që qëndrimet e këtij takimi të hartohen në formë rekomandimesh, të cilat do t’u përcillen Ministrisë së Punëve të Jashtme dhe Ministrisë së Diasporës, që të përfshihen në agjendat e tyre të punës.

Po ashtu është thënë se duhet bashkërenduar me Shqipërinë, e cila e ka Institutin Kombëtar të Mërgatës, si dhe me Maqedoninë dhe Malin e Zi për krijimin një instituti të ngjashëm të përbashkët.

Anëtarët e këtij komisioni kanë vendosur ta thërrasin për herë të tretë ministrin e Punëve të Jashtme, Enver Hoxhaj për të raportuar në komision lidhur me njohjet për Kosovën dhe për punën e misioneve diplomatike në botë, duke shpresuar se kësaj radhe, duke filluar nga mesi i qershorit, ministri do të gjejë kohë t’i përgjigjet kërkesës së komisionit.