Çdo i treti i dënuar për dhunim seksual nuk mbahet fare në burg

Sipas Zyrës Federale të Statistikës (BFS), gjatë vitit 2015 kanë mare dënime të plotfuqishme për përdhunim gjithsej 82 veta. 26 prej tyre kanë marrë dënim me burg me kusht ndërsa 17 të tjerë dënim të pjesshëm me kusht

Foto ilustrim

Gjithnjë më shumë përdhunues në Zvicër shpëtojnë pa mbajtur burg efektiv. Një në tre dhunues, ndonëse me dënim të plotfuqishëm për dhunim seksual nuk përfundon në burg.

Kështu siç shkruan gazeta “SonntagsZeitung” ka ndodhur edhe me një 28 vjeçar i cili qe akuzuar për përdhunim të një vajze 16 vjeçare dhe për abuzim të disa vajzave tjera të mitura. Gjykata e pati dënuar atë me dënim me burg prej 24 muajsh me kusht dhe po ashtu me gjobë me kusht, transmeton albinfo.ch. Koha e kushtit është tri vjet për të dy dënimet. Por, ajo çfarë i dënuari detyrohet me të vërtetë të “vuajë” është një kompensim prej 15.000 franga viktimës kryesore dhe 3000 franga të tjera njërës nga viktimat e abuzimit.

Marrë në përgjithësi, vitin e kaluar në çdo të tretin rast të dhunimit seksual është shqiptuar vetëm dënim me kusht. Ndërsa sipas Zyrës Federale të Statistikës (BFS), gjatë vitit 2015 kanë mare dënime të plotfuqishme për përdhunim gjithsej 82 veta. 26 prej tyre kanë marrë dënim me burg me kusht ndërsa 17 të tjerë dënim të pjesshëm me kusht.

Shifra të ngjashme kemi edhe nga vitet pararendëse. Kështu, në vitin 2014, nga 105 dënimet e shqiptuara me burg për dhunimet seksuale, 30 ishin me kusht dhe 20 pjesërisht me kusht.

Ndërsa sipas Ligjit Penal dhunuesit seksualë duhet të dënohen me burg nga 1 deri 10 vjet, përcjell albinfo.ch. Mirëpo gjyqtarët kanë të drejtë që dënimet me burg deri në 2 vjet t`i shndërrojnë në dënime me kusht. Kjo praktikohet në rastet kur “një dënim efektiv me burg nuk shihet i domosdoshëm për të ndaluar delinkuentin që të kryejë sërish ndonjë delikt.