Kryeministri Thaçi priti afaristë nga Zvicra dhe Gjermania

Thaçi pasi përsëritur ftesën e qeverisë, për bizneset zvicerane dhe gjermane për të rritur investimet e tyre në Republikën e Kosovës

Kryeministri i Republikës së Kosovës, Hashim Thaçi ka pritur sot një delegacion të zgjeruar të afaristëve zviceranë dhe gjermanë, të kryesuar nga përfaqësuesi i Swis, Bruno Gehrig.

I shoqëruar nga zëvendëskryeministrja Mimoza Kusari dhe Ministri i Zhvillimit Ekonomik, Besim Beqaj, kryeministri i Republikës së Kosovës, Hashim Thaçi pasi iu ka uruar mirëseardhje në Republikën e Kosovës, ka zhvilluar një bashkëbisedim me afaristët zviceranë dhe gjermanë, njofton Kosovainfo.

Në takim, kryeministri Thaçi ka potencuar edhe investimet e fuqishme të Qeverisë së Republikës së Kosovës në infrastrukturën rrugore, përkatësisht autostradën Vërmicë-Merdarë, autostradë kjo që është duke e ndërtuar konsorciumi i njohur Bechtel-Enka. Në vazhdim, kryeministri Thaçi ka përmendur fillimin e përgatitjeve për ndërtimin e autostradës Prishtinë-Shkup, procesin e privatizimit të PTK-së, një mundësi kjo e mirë për investitorët seriozë për të zhvilluar sektorin e telekomunikimit në Kosovë, pastaj procesin e suksesshëm të koncesionimit të Aeroportit Ndërkombëtar të Prishtinës “Adem Jashari”, sektorin e energjisë dhe shumë projekte tjera të rëndësishme për zhvillimin ekonomik të vendit.

Në bashkëbisedim me afaristët zviceranë dhe gjermanë, kryeministri Thaçi ka theksuar përkushtimin e qeverisë për zhvillimin e sektorit të Bujqësisë, si një nga sektorët më të rëndësishëm për zhvillimin ekonomik të Kosovës.

Në takim, kryeministri i Republikës së Kosovës, Hashim Thaçi i ka njoftuar investitorët zviceranë dhe gjermanë, për Planin e Zhvillimit Ekonomik të Kosovës, që është hartuar nga Qeveria e Republikës së Kosovës, një plan ky i hartuar nga ekspertë vendorë dhe ndërkombëtarë, që përcakton prioritetet kryesore të zhvillimit ekonomik të Kosovës, afatet kohore për implementimin e këtyre prioriteteve dhe rrjedhimisht një plan që hap mundësi të shumta për investitorët e huaj për të investuar në Republikën e Kosovës.

Kryeministri Thaçi po ashtu theksoi se forcimi i sektorit privat, infrastruktura ligjore në fuksion të lehtësirave të të bërit biznes, rritja e vendeve të reja të punës do të vazhdojë të jetë në agjendën prioritare të punës së Qeverisë së Republikës së Kosovës.

Më tej, kryeministri Thaçi pasi ka theksuar raportet e shkëlqyera të Kosovës me Zvicrën dhe Gjermaninë në të gjitha fushat me interes të përbashkët, ka ripotencuar ftesën e tij dhe të qeverisë që drejton, për të gjitha bizneset zvicerane dhe gjermane për të rritur investimet e tyre në Republikën e Kosovës.

Nga ana e tyre, afaristët zviceranë dhe gjermanë, falënderuan kryeministrin Thaçi për mikëpritjen dhe theksuan interesimet e tyre konkrete për të investuar në Republikën e Kosovës, në sektorë të ndryshëm ekonomikë.