BE-ja kërkon nga Zvicra trajtim të barabartë të qytetarëve të saj me zviceranët

BE-ja kërkon që Zvicra t`i trajtojë në mënyrë të barabartë shtetasit e BE-së me shtetasit e vet, në tregun e punës. Këtë barazi duhet ta sigurojë Zvicra pavarësisht nëse shtetasit e BE-së jetojnë në vendet e tyre ose në Zvicër

Zgjidhja që ka propozuar qeveria e Zvicrës, për përparësinë e vendorëve “light” e gjendur në mes të kërkesës së SVP-së kundër migracionit masiv (të votuar në referendum) dhe kritereve të BE-së për barazi të të gjithëve, nuk është pritur mirë nga BE-ja. Sinjali që vjen nga Brukseli është kuptimplotë: Zvicra është e detyruar që gjatë zbatimit të Iniciativës kundër Migracionit Masiv të mos e dëmtojë marrëveshjen me BE-në për lëvizje të lirë, shkruan srf.ch.

Për të trajtuar këtë problem, BE ka kërkuar ngritjen e komisionit të përzier. Kjo në një kohë kur Zvicra dhe BE-ja janë duke zhvilluar negociata në nivelet më të larta. Por ky hap është konsekuent pasi që marrëveshja për lëvizje të lirë në mes të BE-së dhe Zvicrës parasheh që secila palë në rast nevoje për bisedime të thërrasë komisionin e përmendur, përcjell albinfo.ch. Në këtë rast është BE-ja e cila ka shqetësime bazike juridike në rastin e “Përparësisë së vendorëve light” të prezantuar nga Zvicra, prandaj kërkon përgjigje nga ajo. Me këtë kërkesë BE-ja i dërgon sinjal Zvicrës se duhet që t`i përmbahet marrëveshjes.

Me fjalë tjera, BE-ja kërkon që Zvicra t`i trajtojë në mënyrë të barabartë shtetasit e BE-së me shtetasit e vet, në tregun e punës. Këtë barazi duhet ta sigurojë Zvicra pavarësisht nëse shtetasit e BE-së jetojnë në vendet e tyre ose në Zvicër.

Zvicra, nëse i përmbahet kërkesës së BE-së duhet të sqarohet në lidhur me komisionin. Në të duhet të bëjnë pjesë përveç përfaqësueseve të Komisionit të BE-së edhe përfaqësues të shteteve anëtare të BE-së.