EUROSTAT: Shqipëri, çmimi më i lartë i energjisë në Ballkan

Shqipëria ka çmimin më të lartë të energjisë për konsumatorët familjarë krahasuar me çdo vend tjetër në rajonin e Ballkanit, shkruajnë mediat në Tiranë, përcjell albinfo.ch.
Të dhënat e fundit të publikuara nga  Eurostat tregojnë se këtë vit energjia ka kushtuar më lirë në Kosovë, Serbi, Maqedoni dhe Bosnjë. Çmimi i energjisë në Shqipëri është i ngjashëm me atë të Malit të Zi e Bullgarisë, ndonëse prodhohet energjia nga burime të lira, siç janë burimet hidrike. Në Shqipëri, si në Bullgari, çmimi është 0.1 euro për kilovat orë.

Ne Evropë, çmimin më të lartë e mbajnë vende të zhvilluara, si Danimarka dhe Gjermania, ku energjia kushton mesatarisht 0.3 euro për kilovat orë. Por këto vende kanë edhe burime të tjera alternative të përdorimit të energjisë, transmeton albinfo.ch.

Siç raporton abcnews, në Shqipëri, i vetmi burim që ofron një alternativë të pjesshme është gazi i lëngshëm. Shqipëria nuk ka një rrjet shpërndarje të gazit, ndaj ky i fundit përdoret pak.

Krahas kësaj, prej vitit të ardhshëm edhe gazi i lëngshëm do të kushtojë më shtrenjtë për shkak se do te fillojë të aplikohet akcizë.
Akciza do të aplikohet për gazin për automjetet, por nuk përjashtohet mundësia e rritjes së çmimeve në mënyrë abuzive në gazin që do të përdoret për gatim e ngrohje.