Breivik dëshironte të takojë Karaxhiqin

Karaxhiqi, sipas manifestit të Breivik "përherë do të vlerësohet dhe kujtohet si një kryqëzator i nderuar dhe një hero evropian i luftës"

Në shtypin holandez janë botuar mjaft shkrime që merren me personalitetin e autorit të krimit të rëndë të bërë para dy ditësh në Norvegji. Një shkrim i botuar në gazetën holandeze “Telegraf” bën fjalë për synimin e kriminelit Anders Behring Breivik për të takuar kriminelin tjetër, serbin Radovan Karaxhiq.

Në vazhdim pjesë nga teksti i gazetës “Telegraf”.

“Anders Behring Breivik dëshiron ta takojë Radovan Karaxhiqin, njeriun që sipas tij është një hero. Kështu mund të lexohet në manifestin e publikuar kësaj jave në internet, i cili thuhet se ka rrjedhur nga njeriu i dyshuar për atentatet në Norvegji.

Teksti është i mbushur me lavdërime për përpjekjet e ish-presidentit të serbëve të Bosnjës dhe Hercegovinës për “çlirimin e Serbisë nga islamizmi”. Breivik, vetë e ka hartuar një plan se si t’i deportojë myslimanët nga Evropa, plan që shkon deri në vitin 2083.

Karagjiqi, sipas manifestit “përherë do të vlerësohet dhe kujtohet si një kryqëzator i nderuar dhe një hero evropian i luftës”. Shkruesi mohon se Karagjiqi është “një vrasës masiv dhe racist”, sikur e paraqesin të tjerët.

Karagjiqi gjithashtu duhet edhe para GJND-së të përgjigjet për gjenocidin e shkaktuar (vrasje të popujve), për vrasjen e 8000 burrave dhe djemve myslimanë nga Srebrenica. Por sipas manifestit janë pikërisht ata myslimanët, që kanë shkaktuar “gjenocid indirekt” duke e populluar fuqishëm Bosnjen dhe Hercegovinën me dekada të tëra, “gjë që shumë përputhet me këtë që ne po e përjetojmë në Evropën Perëndimore”.

Ai “zbatim luftarako-demografik” -sipas tekstit, është “një prej formave më asgjesuese të Xhihadit”. Karaxhiqi ka dashur që Bosnjen dhe Hercegovinën “ta çlirojë nga ideologjia e urrejtjes gjenociduese e cila njihet si islamizëm”, përfundon gazeta “telegraf”. (Përktheu nga holandishtja: Florim Behluli).