Numri i emigrantëve arriti në 250 milionë në vitin 2015

Numri i emigrantëve në botë është rritur nga 79 milionë sa ishte në vitin 1960, në 250 milionë në vitin 2015. Këto të dhëna paraqiten nga agjencia “Reuters”, me rastin e Ditës Ndërkombëtare të Emigrantëve, përjell albinfo.ch.

Emigrantët ndërkombëtarë, ata që jetojnë në një vend tjetër nga atdheu i tyre, përbëjnë deri 3.3% të popullsisë së botës.

Emigrantët dhe refugjatët shpesh udhëtojnë në të njëjtën mënyrë, por emigrantët ekonomikë largohen nga vendi për të kërkuar mundësi më të mira ekonomike për veten e tyre dhe familjet e tyre në një vend tjetër, derisa refugjatët ikin nga konfliktet dhe persekutimet.

Në fund të vitit 2015, në mbarë botën ka pasur 65.3 milionë njerëz të zhvendosur me dhunë, nga të cilët 21.3 milionë ishin refugjatë, 40.8 milionë janë zhvendosur brenda vendit dhe 3.2 milionë ishin azilkërkues.

Një në 113 njerëz në botë është kandidat për azil, apo refugjat ose i zhvendosur.

Këtë vit, më shumë se 4.700 emigrantë vdiqën duke u përpjekur për të arritur në Evropë nëpërmjet detit, duke e bërë atë vitin më vdekjeprurës. Italia është destinacioni kryesor për emigrantët dhe refugjatët që vijnë nga deti me anije në Evropë, dhe këtë vit në këtë vend erdhën më shumë se 179,000 njerëz.
SHBA ka numrin më të madh të emigrantëve ndërkombëtarë (47 milionë), e ndjekur nga Gjermania (12 milionë), Rusia (11.6 milionë), Arabia Saudite (10.2 milionë) dhe Bahreini (8.5 milionë).

Në vitin 2015 emigrantët në mbarë botën kanë dërguar pothuajse 600 miliardë $ për të afërmit në vendet e tyre.
Nëntë nga 10 refugjatë jetojnë në vendet e zhvilluara, ndërsa Turqia ka më se 3 milionë refugjatë.

Numri i njerëzve, të cilët kanë lëvizur për shkak të fatkeqësive natyrore, duke përfshirë stuhitë, përmbytjet dhe thatësirat, arrin në 22.5 milionë njerëz në vit, deri në vitin 2008, dhe kjo shifër vazhdon të rritet.