Vritet në Milano sulmuesi i dyshuar i Berlinit

Amri ka qenë duke ecur në rrugë kur ka kaluar patrulla e policisë dhe i ka kërkuar dokumentet e identifikimit. Por, në vend të dokumenteve, Amri ka nxjerrë një pistoletë duke qëlluar në drejtim të policisë

Keystone

Tuniziani Ansi Amri , i cili ishte i dyshuari kryesor për kryerjen e sulmit të hënën në tregun e Krishtlindjes në Berlin, është vrarë sot në një shkëmbim zjarri me policinë në qytetin verior italian Milano, njoftojnë burime të sigurisë.

Sipas raportit të policisë italiane, ishte një kontroll normal rrugor rreth orës 03.00 të mëngjesit. Në atë kohë, Amri ka qenë duke ecur në rrugë kur ka kaluar patrulla e policisë dhe i ka kërkuar dokumentet e identifikimit. Por, në vend të dokumenteve, Amri ka nxjerrë një pistoletë duke qëlluar në drejtim të policisë, shkruan të premten Reuters dhe ANSA.  

Më pas siç shkruan gazeta austriake “oe24.at”, Amri ka thirrur: “Allahu Akbar” përcjell “albinfo.ch”.

Në fillim viktima nuk është identifikuar, pasi nuk kishte dokumente me vete, por më pas gjithçka u vërtetua  se bëhet fjalë për vrasësin në Berlin. Ndërkaq, polici i plagosur ndodhet në spitalin e Monzës në gjendje të rëndë.

Ndërkohë, konferencë për shtyp ka mbajtur Ministri i Brendshëm i Italisë Marco Miniti i cili ka falënderuar policinë italiane për ndalimin e tunizianit si dhe për atë që po e bën policia e vendit të tij në ruajtjen e sigurisë.