Ruajtja e identitetit të mërgimtarëve prioritet i Makollit

Ministri i Diasporës, Ibrahim Makolli, me ftesë të kuvendit komunal të Vitisë,  mori pjesë në një tubim me bashkatdhetarë tanë që jetojnë jashtë vendit.

Ministri Makolli, i falënderoi mërgimtarët e komunës së Vitisë për kontributin e dhënë me vite të tëra për ndihmën e dhënë familjeve, si dhe për kontributin e jashtëzakonshëm të tyre për ndërtimin e shtetit të Kosovës.

Ministri Makolli, foli me këtë rast për prioritet e ministrisë që ai drejton, duke potencuar hartimin e politikave për ruajtjen e identitetit, gjuhës dhe kulturës për mërgimtarët tanë, në veçanti fëmijë e tyre.

Ai ka deklaruar se, me themelimin e Ministrisë së Diasporës, mërgata nga tash do të ketë trajtim më të vëmendshëm institucional.

Ministri Makolli, ka theksuar po ashtu se, Ministria e Diasporës do të angazhohet dhe do të bashkëpunojë ngushtë me të gjitha dikasteret qeveritare për krijimin e kushteve të favorshme dhe lehtësuese për mërgimtarët që të investojnë në vendlindje.

Ministri Makolli, falënderoi me këtë rast kryetarin, Nexhmedin Arifi dhe kuvendin komunal të Vitisë për organizimin e manifestimeve për nderë të ardhjes së mërgimtarëve tanë që në këtë kohë vijnë për pushime në vendlindje.

Ministri i Diasporës, Ibrahim Makolli dhe zëvendësministri Qerim Bajrami, kanë marr pjesë edhe në një tubim në fshatin Reçan të Prizrenit me mërgimtarë nga komuniteti boshnjak.

Edhe me këtë rast ministri Makolli, i njoftoi të pranishmit me aktivitetet e kësaj ministrie dhe u bëri të qartë atyre se, ministria që ai drejton do të merret me të gjitha problemet me të cilat ballafaqohen mërgimtarët kosovarë, pavarësisht përkatësisë së tyre etnike.

Nga ana e tij, zëvendësministri Qerim Bajrami, tha se synimi i Ministrisë së Diasporës është që të ushtrojë kujdes shtetëror për mërgimtarët, që përbëjnë një të tretën e popullsisë së Kosovës.

Tubimi në Viti dhe ai në fshatin Reçan të Prizrenit, u realizuan në vazhdën e takimeve që ministri Makolli dhe zyrtarë të tjerë të ministrisë po i bëjnë me mërgimtarët tanë.