Qeveria zotohet për reciprocitet edhe në zbatimin e tri marrëveshjeve

Qeveria e Kosovës është e zotuar që t’i respektojë tri marrëveshjet e arritura me Serbinë gjatë pesë raunde bisedimesh.

Zëvendëskryeministri Hajredin Kuçi ka thënë se Kosova nuk lëviz prej marrëveshjeve, por edhe në këtë rast do të kërkojë reciprocitet nga Serbia.

Marrëveshjet, që ndryshe janë quajtur edhe konkluza, për shkak se nuk janë nënshkruar nga palët, është paraparë të fillojnë së zbatuari nga 1 nëntori i këtij viti, andaj zëvendëskryeministri Kuçi ka thënë se Kosova do të jetë korrekte në këtë drejtim.

Ai ka theksuar se Kosova është shtet serioz dhe i respekton marrëveshjet ndërkombëtare dhe është e gatshme për bashkëpunim ndërshtetëror edhe me Serbinë si me çdo vend fqinj, por jo për çështje të brendshme të Republikës së Kosovës.

Kuçi, ka përsëritur deklaratat e kryeministrit Thaçi për aksionin në veri, duke thënë se Qeveria e Kosovës nuk është në konfrontim me popullatën lokale serbe në veri, por me shkelësit e ligjit.