Doli nga shtypi numri më i ri i albinfo.ch

Për të ofruar një pasqyrë të asaj çfarë ofron Kosova për “pushimet e bardha”, redaksia ka realizuar një numër tekstesh nga disa vende në Kosovë ku pushuesit mund të shijojnë atmosferën e pushimeve në borë

Numri më i ri, 22 i magazinës albinfo.ch, vjen saktësisht gjatë festave të fundvitit  në duart e lexuesve. Ky numër i kushtohet në një pjesë të madhe të tij përmes tërësisë tematike “Të gjithë në borë, Kosova ju pret”,  pushimeve dimërore në Kosovë.

Për të ofruar një pasqyrë të asaj çfarë ofron Kosova për “pushimet e bardha”, redaksia ka realizuar një numër tekstesh nga disa vende në Kosovë ku pushuesit mund të shijojnë atmosferën e pushimeve në borë. Brezovica dhe Boga me infrastrukturën hoteliere dhe sportive që ofrojnë janë në këtë pikë të patejkalueshme por, nuk mungojnë edhe zbulimet e disa perlave të vogla e më pak të njohura, që kanë po ashtu perspektivë për zhvillimin e turizmit dimëror.

Alpinizmi, bjeshkataria, ecja nëpër borë dhe trajta tjera të shfrytëzimit të resurseve që ka Kosova sa u përket bjeshkëve dhe borës, shpalosen përmes bisedave me ofertues të ndryshëm dhe punëtorë sportivë dimërorë.

Sigurisht, krahas turizmit dhe borës, magazina ofron edhe blloqe tjera tematike, duke prezantuar portrete, intervista dhe artikuj tjerë që pasqyrojnë kryesisht jetën dhe zhvillimet në diasporën shqiptare të Zvicrës.

Ky numër i revistës i pret lexuesit edhe në Aeroportin “Adem Jashari” të Prishtinës, pasi që është konceptuar për t`ua prezantuar resurset e sporteve dimërore dhe ofertat tjera kryesisht mërgimtarëve që shkojnë për pushime në Kosovë.

Po ashtu, sikurse edhe deri tash, albinfo.ch mund të gjendet në të gjitha pikat e frekuentuara nga shqiptarët në Zvicër. Ndërsa ata të cilët preferojnë që magazina jonë të ju shkojë në shtëpi, me postë, mund ta bëjnë parapagimin e saj.