Mavraj nis aventurën në Hamburg

“Hamburgu është një klub i madh me tifozë të shkëlqyer të cilëve dëshirojmë t’u dhurojmë buzëqeshje në pjesën e dytë të sezonit”, deklaroi mbrojtësi shqiptar

Mbrojtësi i Kombëtares shqiptare, Mërgim Mavraj ka filluar edhe zyrtarisht aventurën në skuadrën e madhe gjermane, Hamburg, shkruan albinfo.ch.

Ai u paraqit në stërvitje dhe ka qenë në fokus të mediave, pasi shihet si përforcim shumë i madh për skuadrën gjermane. “Jam i lumtur që jam në Hamburg. Objektivi kryesor është padyshim mbijetesa në Bundesligë”, deklaroi në fillim Mavraj.

Ai ka thënë se Hamburg është një skuadër e madhe me tifozë të shkëlqyeshëm. “Pres me padurim të marr përsipër rolin që më është besuar në skuadër dhe dua të marr përgjegjësitë që më janë dhënë. Eksperienca luan një rol të rëndësishëm në këtë aspekt. Hamburgu është një klub i madh me tifozë të shkëlqyer të cilëve dëshirojmë t’u dhurojmë buzëqeshje në pjesën e dytë të sezonit”, theksoi mbrojtësi shqiptar.

Mavraj do të mbajë numrin 3, që nuk e kishte më parë. Te Kolni kishte numrin 19, derisa në Kombëtaren shqiptare atë 15.