Berna zgjedh për herë të parë një kryebashkiak të gjelbër

Kryetari i ri i Bernës, Alec von Graffenried, vjen pas politikanit të SP-së, Alexander Tschäppät, i cili ka mbajtur këtë post prej afër 13 vitesh. Partia e tij ka qenë për 24 vjet në krye të ekzekutivit

Keystone

Sot në Bernë është mbajtur raundi i dytë i zgjedhjeve për kryebashkiak të qytetit. Këtë post qytetarët ia besuan politikanit nga “Lista e Lirë e Gjelbër”, Alec von Graffenried, shkruan srf.ch. Ai kishte përballë tij kandidaten nga Partia Socialdemokrate Ursula Wyss, e cila kishte mbetur bashkë me të për të garuar në rundin e dytë.

Graffenried 54 vjeçar ka fituar 57.9 për qind të votave ose gjithsej 23.749 sish ndërsa rivalja e tij, Wyss pjesën tjetër, 17.262 ose 42.09%.

Në raundin e parë që ishte mbajtur në fund të nëntorit të vitit të kaluar, Graffenried kishte fituar po ashtu më tepër vota se Wyss por ato nuk i kishin mjaftuar për të fituar shumicën e nevojshme.

Kryetari i ri i Bernës vjen pas politikanit të SP-së, Alexander Tschäppät, i cili ka mbajtur këtë post prej afër 13  vitesh. Nga ana tjetër, për SP-në humbja e Wyss ishte veçanërisht e hidhur për faktin se i është dashur ta lëshojë postin për herë të parë pas 24 vitesh.

Ekzekutivin e Bernës prej pesë vetash e përbëjnë dy përfaqësues të SP-së dhe dy të Partisë së Gjelbër.

Wyss ia ka uruar rivalit të saj postin e ri dhe është zotuar se do të ketë bashkëpunim të mirë me të, në funksionin e saj si përgjegjëse për ndërtim në ekzekutivin e Bernës.