Januzaj: Pogba ishte sikur vëlla për mua

“Është një mik shumë i mirë. Te United ne gjithmonë kemi qëndruar bashkë. Dilnim për darkë bashkë, luanim ‘Play-Station’. Ishte si një vëlla për mua”, deklaroi Januzaj

Mesfushori anësor shqiptar, Adnan Januzaj ka thënë se ka marrëdhënie shumë të mira me Paul Pogba dhe francezi i ka kërkuar që të rikthehet në United, shkruan albinfo.ch.

“Paul Pogba është një lojtar i mrekullueshëm. Ai bëri një zgjedhje tjetër ku doli i suksesshëm dhe tashmë është rikthyer në shtëpinë e tij. Pogba mbetet një lojtar i madh”, ka thënë futbollisti me prejardhje nga Istogu, duke shtuar: “Është një mik shumë i mirë. Te United ne gjithmonë kemi qëndruar bashkë. Dilnim për darkë bashkë, luanim ‘Play-Station’. Ishte si një vëlla për mua”, theksoi mesfushori shqiptar.

Madje, Pogba i ka kërkuar të rikthehet në “Old Trafford”. “Më ka pyetur nëse dua të rikthehem te Manchester United. Ai do që të luajë më mua. Por, tani jam te Sunderlandi dhe duhet të jap më të mirën time për këtë klub. Këto janë vendime që merren nga lart. Unë jam një futbollist profesionist dhe më duhet të jem i tillë edhe jashtë fushës”, theksoi Januzaj.

Ai është i huazuar në Sunderland nga Manchester United, derisa më parë ishte i ftuar edhe te Belgjika, por kjo nuk ka ndodhur në dy vitet e fundit.