Dënim me kusht për gardianen e arratisur nga burgu me të dashurin e saj të burgosur

Angela Magdici është dënuar nga Gjykata e Qarkut në Dietikon (Cyrih) me 15 muaj burg me kusht, që nënkupton se nuk detyrohet të vuajë burg efektiv.

Keystone

Rasti i Angela Magdici nga Cyrihu pati bërë bujë të madhe në mediat zvicerane vitin e kaluar. Ikja spektakolare nga burgu e gardianes zvicerane së bashku me të dashurin e saj, të burgosurin sirian, Hassan Kiko, ishte diçka e denjë vetëm për filma. “Bonny and Clyde” (Boni e Klajd) ose Romeo e Xhuljeta, ishin emërtimet me të cilat identifikohej çifti i ri i jashtëzakonshëm, nga mediat.

Megjithatë, çifti aventurist nuk kishte mundur të shkonte larg, ishte kapur shpejt në Itali dhe ishte ekstraduar në Zvicër, ku do t`u bëhej dënimi, shkruajnë mediat zvicerane.

Ndërkohë që Hassan Kiko kishte vazhduar dënimin dhe ende mbetet e hapur nëse do të marrë një dënim shtesë, dënimi i të dashurës së tij është bërë sot.

Angela Magdici është dënuar nga Gjykata e Qarkut në Dietikon (Cyrih) me  15 muaj burg me kusht, që nënkupton se nuk detyrohet të vuajë burg efektiv.  Avokati i saj kishte kërkuar për klienten e tij vetëm gjashtë muaj me kusht me një kohë provuese prej dy vitesh. Nga ana tjetër, Prokuroria ishte për një dënim të kombinuar me kusht prej 27 muajsh, nga të cilët shtatë muaj do të ishin burg efektiv.

Angela ka thënë se vendimi për t`u arratisur ka qenë mendjelehtë dhe se është penduar për këtë. Por ajo vazhdon ta dojë Hassanin e saj, i cili mund të marrë një dënim shtesë prej deri 6 muajsh burg.