Ahmeti: Nuk isha në dijeni që jahti ishte i Devollëve

Shpend Ahmeti, kryetari i Prishtinës fotografinë e tij në jaht në Mal të Zi e konsideron si “sulm” në prag të zgjedhjeve të reja komunale

Kryetari i Komunës së Prishtinës, Shpend Ahmeti, një javë pas publikimit nëpër mediat kosovare, ka pranuar se fundjavën e kaluar ka qëndruar në jaht në bregdetin e Malit të Zi. Ai thotë se ka qëndruar në Budvë dhe ka qëndruar në një jaht për të cilën thotë se nuk e kishte ditur se është i Blerim Devollit të kompanisë “Devolli”.

Ahmeti për emisionin “JNK” deklaroi se ka qenë i ftuar për të hipur në jaht së bashku me bashkëshorten e tij dhe ka qenë një pushim i thjeshtë. Ndërsa publikimin e tij në jaht nga mediat, ai e sheh si luftë në prag të zgjedhjeve lokale.

“Aty ka pasur grupe të ndryshme dhe kam takuar gjatë ditës plot njerëz tjerë dhe pasi kam hangër darkë kam shku atje se aty janë të parkuara dhe unë kam hy me gruan time dhe brenda 5 minutave lajmi ka dalë në portal. Kur më kanë ftuar, unë nuk kam pyet e kujt është kjo jaht prej kujt e kanë ble.., nuk mundet të kthehen mbrapa qoftë edhe nëse është e Devollit”, tha Ahmeti.

“Kam pirë koka- kollë zero. Aty ka qenë edhe Blerim Devolli që erdhi mandej”, tregoi Ahmeti, duke  e konsideruar fotografinë e tij në këtë jaht në Mal të Zi është “sulm” në prag të zgjedhjeve të reja komunale.

“Ka arsye të ndryshme pse ka ndodhur ky sulm, nga portalet që mendoj se janë të lidhura ngushtë me qeverinë dhe njerëz të caktuar, por megjithatë unë jam i gëzuar sepse mua qytetarët më mbajnë në një standard të llogaridhënies. Nuk jam person as që e ndjek luksin e as që shpenzoj në para të popullit, por një fotografi e kanë kthyer si sulm ndaj meje”, tha Ahmeti.

Familja “Devolli” nga Peja është ndër familjet më të pasura në Kosovë, e cila në pronësinë e saj ka një varg biznesesh që kanë vënë emër në tregun kosovar. Në pronësi të kësaj familjeje është “Princ kafe”, qumështi “Vita”, terminali dhe qendra e homologimit të automjeteve, restorantet “Princ”, fabrika e dyshekëve “Comodita”, ajo e miellit “Msillosi”, “ZMobile”…etj.