Botërori i Fluturimeve të Lira, ngjarje e jashtëzakonshme në Vlorë

Imazh i këtij Kampionati është aktorja shqiptare me famë botërore, Eliza Dushku, e cila po qëndron në Shqipëri

Për herë të parë në Shqipëri po mbahet Kampionati Botëror i Fluturimeve të Lira. Ky Kampionat ka filluar më 5 maj dhe do të zhvillohet deri më 14 maj, shkruan albinfo.ch.

Në këtë Kampionatin po marrin pjesë 150 garues nga 28 vende të ndryshme të botës, duke përfshirë edhe garuesit nga Kosova e Shqipëria.

Për disa ditë do të ketë jo vetëm sport ekstrem, por edhe një javë kulturore që do ta kthejë bregdetin vlonjat në skenë të hapur natyrore mes sportit të qiellit dhe trashëgimisë kulturore në tokë, bëjnë të ditura mediat lokale.

Imazh i këtij Kampionati është aktorja shqiptare me famë botërore, Eliza Dushku, e cila po qëndron në Shqipëri.

Në një postim në rrjetin social Facebook, një ditë më parë aktorja Dushku shkruante, “Ju kujtohen ca pamje të bregdetit dhe maleve shqiptare në dokumentarin tim? Ato i ka realizuar Alket Islami dhe do të jem e pranishme në ngjarjen e organizuar nga ai”, ka shkruar Dushku në “Facebook”.

Aeronautika botërore ka zgjedhur Vlorën për këtë kampionat, që dëshmon kapacitetet e Shqipërisë në këtë fushë sportive, ndërsa një kampionat i tillë i përmasave botërore vjen për herë të parë në Shqipëri.