Presidenti Nishani dekreton 25 qershorin si datë të zgjedhjeve

Vetëm tri ditë pas arritjes së marrëveshjes “Rama-Basha” për tejkalimin e krizës në Shqipëri, presidenti Bujar Nishani dekretoi datën e zgjedhjeve parlamentare për 25 qershor, ditë e diel

Presidenti i Republikës së Shqipërisë, Bujar Nishani ka dekretuar 25 qershorin datën e zgjedhje parlamentare në vend. Ky dekretim nga presidenti pason marrëveshjen ndërmjet kryetarit të Partisë Socialiste, Edi Rama dhe liderit opozitar, Lulzim Basha, të cilët i dhanë fund ngërçit politik disamujor në Shqipëri.

“Në respekt të Kushtetutës dhe dispozitave të Kodit Zgjedhor, si dhe bazuar në kërkesën e krerëve të mazhorancës dhe të opozitës për caktimin e datës së zgjedhjeve parlamentare…Presidenti i Republikës vendosi të datën e mbajtjes së zgjedhjeve për Kuvendin e Shqipërisë, më 25 qershor 2017”, thuhet në vendimin e Nishanit.

Theksojmë se kjo datë i përket ditës së diel të fundit të periudhës zgjedhore të parashikuar në Kodin Zgjedhor për mbajtjen e zgjedhjeve për Kuvendin e Shqipërisë.

Gjithashtu, Presidenti i Republikës ka vendosur të dekretojë të njëjtën datë, 25 qershor 2017, edhe për zhvillimin e zgjedhjeve vendore të pjesshme për kryetar të Bashkisë së Kavajës.