Tre universitete zvicerane në Top 100-shin botëror

Në mesin e 100 universiteteve më të mira në botë kësaj here, pos ETH Zürich dhe EPFL Lausanne hyn edhe Universiteti i Cyrihut, edhe pse nga fundi i listës

Dy universitetet politeknike të Zvicrës: ETH i Cyrihut dhe EPFL i Lozanës janë rregullisht në mesin e universiteteve prijëse të botës, në të gjitha aspektet. Ato, dhe sidomos ETH të Cyrihut, i gjejmë në të gjitha ranglistat e universiteteve më cilësore në botë. Kështu është edhe në listën e përpiluar nga magazina “Times Higher Education” të publikuar sot. Por me një risi: në mesin e 100 universiteteve më të mira në botë kësaj here, pos dy të përmendurve, hyn edhe Universiteti i Cyrihut, shkruan handelszeitung.ch.

Kjo ndodh pas një pauze prej gjashtë vitesh, kur ky universitet s`ka mundur të radhitet në Top 100, transmeton albinfo.ch. Tash ai  bën pjesë në grupin mes vendit të 90 dhe 100 të kësaj rangliste.

Ndërsa si zakonisht, më lart në listë është ETH i Cyrihut, në vendin e 22-të, ndërsa EPFL i Lozanës, në vendin e 45-të. Por ndërkohë që ETH ka rënë për tri vende më poshtë në krahasim me ranglistën e fudit, EPFL është ngritur për tri vende.

Vet kreu i ranglistës është “i rezervuar” si zakonisht edhe kësaj here për universitetet amerikane. Kështu, universiteti i famshëm i Harvardit është shpallur për të shtatin vit me radhë më i miri në botë, përcjell albinfo.ch. Menjëherë pas tij vjen Massachusetts Institute of Technology ndërsa vendin e tretë e zë Universiteti i Stanfordit.

Në Top 100 bëjnë pjesë vetëm 27 universitete nga vendet e Evropës perëndimore ndërsa ka një prani të madhe të atyre nga Azia.

Kjo ranglistë është përpiluar nga anketa me 10’566 studiues  nga 137 vende.