Miratohet deklarata “kompromis” për klimën në G-20

KEYSTONE

Krerët e shteteve anëtare të Grupit të 20-ës janë pajtuar për të miratur një deklaratë të përbashkët “kompromisi” nga samiti në Hamburg, duke marrë në konsideratë tërheqjen amerikane nga traktati i Parisit për klimën.

Deklarata thotë se Shtetet e Bashkuara do të bashkëpunojë ngushtë me vendet e tjera, duke i ndihmuar ata që të përdorin lëndët djegëse fosile të pastra dhe më efikase dhe do të ndihmojnë me krijimin e burimeve të energjisë së rinovueshme dhe të pastër.

“Ne kemi marrë parasysh vendimin e SHBA-së për t’u tërhequr nga traktati i Parisit. Udhëheqësit e anëtarëve të tjerë të G20-ës konfirmuan angazhimin e tyre për traktatin e Parisit për klimën”, thuhet në një deklaratë të përbashkët.

G-20 bën thirrje për luftë kundër proteksionizmit dhe për të inkurajuar tregtinë e lirë.

Udhëheqësit botërorë u shprehen të kënaqur me vendimet e miratuara në takimin dyditor të G20-ës.

Nikoqirja e forumit, kancelarja gjermane, Angela Merkel, është e kënaqur për shkak se të gjitha vendet e Grupit, duke përjashtuar Shtetet e Bashkuara, u dakorduan për zbatim të shpejtë të traktatit të Parisit për klimën.

“Ne kemi arritur rezultate të mira në disa zona, pavarësisht bllokadës nga ana e Shteteve të Bashkuara për shkak të klimës”, shpjegoi Merkel.

Ajo tha se ishte e kënaqur nga takimi me Putinin dhe Trumpin, duke shprehur shpresën se dialogu mes dy liderëve do të vazhdojë.

Presidenti francez, Emmanuel Macron, vuri në dukje se është “krijuar ekuilibri i nevojshëm” për çështjet klimatike dhe tregtisë. Ai e përshëndeti marrëveshjen për të luftuar financimin e terrorizmit.

Macron njoftoi se do të organizojë një samit të ri mbi ndryshimet klimatike më 12 dhjetor, në përvjetorin e nënshkrimit të marrëveshjes klimatike të Parisit.

Sipas presidentit rus, Vladimir Putin, kanë gjetur kompromis “optimal” mbi çështjen e klimës, e cila ndan liderin amerikan Donald Trump dhe udhëheqës të tjerë botërorë të samitit.