Një dasmë në Suharekë që u kthye në tragjedi

Nga të shtënat me armë zjarri, tri vajza janë plagosën mbrëmë në fshatin Tërnje të komunës së Suharekës, derisa po merrnin pjesë në aheng

Foto ilustrim

Shqiptarët në Kosovë po vazhdojnë ta shpërfillin apelin e Policisë “festo me zemër e jo me armë” dhe pikëtish ky injorim i kësaj sintagme, ka bërë që një dasmë në Suharekë të kthehet në një tragjedi. Nga të shtënat me armë zjarri, tri vajza janë plagosën mbrëmë në fshatin Tërnje të komunës së Suharekës, derisa po merrnin pjesë në aheng.

Vajzat e lënduara u dërguan menjëherë në spitalin rajonal të Prizrenit, ku morën ndihmën e parë. Dy prej tyre u mjekuan dhe u lanë të lira, ndërsa njëra që mori plagë serioze në pjesën e poshtme të barkut, u dërgua në Qendrën Klinike Universitare të Kosovës në Prishtinë.

Policia rajonale intervenoi shpejt, duke arrestuar dy nga personat që dyshohet se kanë shtënë me armë.

Policisë së Kosovës, apelon tek qytetarët që të mos përdoren armët në gëzimet familjare, pasi organet e rendit do të jenë aty në çdo kohë, e ligji për përdoruesit e armëve do të jetë i pamëshirshëm. Policia lidhur me rastin në Suharekë thotë se ka arrestuar dy persona, të cilëve u janë konfiskuar, një kallashnikov i prodhimit jugosllav, një pistoletë “Ekol Firat”  dhe disa fishekë.