Refugjati “ka frikë nga fluturimi”, e dëbojnë në Maqedoni me kombibus

Azilkërkuesi i refuzuar është vozitur rreth 2000 kilometra nga Dyseldorfi deri në Maqedoni me përcjelljen përkatëse prej 4 zyrtarësh!

Ndodh edhe kjo: Një refugjat nga Maqedonia, të cilit i ishte refuzuar qëndrimi në Gjermani dhe duhej të riatdhesohej, kishte rezistuar të kthehej me aeroplan pasi që kishte frikë nga fluturimi, shkruan rp.online.de.   Për ta realizuar megjithatë dëbimin, autoritetet janë detyruar ta transportojnë atë enkas me një kombibus, transmeton albinfo.ch. Me fjalë tjera, azilkërkuesi i refuzuar është vozitur rreth 2000 kilometra nga Dyseldorfi deri në Maqedoni me përcjelljen përkatëse prej 4 personash.

“Dëbimet përmes rrugës tokësore ndërmerren më së shpeshti kur, për shkaqe shëndetësore bëhet i pamundur deportimi me aeroplan, ose kur një i tillë ka dështuar për shkak të rezistencës fizike”, thuhet në një sqarim të ministrisë për integrim të landit NRW. “Ndërsa rastet kur nga frika prej fluturimit dëbimi bëhet në rrugë tokësore, ndodhin në mënyrë të izoluar”.

Sipas këtij sqarimi, dëbimet e tilla realizohen më së shpeshti me kombibusët e autoriteteve për të huaj, përcjell albinfo.ch.  Mbështetja policore nevojitet në rastet kur bëhet fjalë për persona të dhunshëm që duhet të dëbohen. Por zëdhënësi i ministrisë nuk ka përmendur numrin e këtyre rasteve dhe as koston për realizimin e dëbimeve të këtij lloji.