Zviceranët, të dytët në Evropë për blerje online

Këto të dhëna i ka nxjerrë një studim krahasimtar që e ka bërë ofertuesi i të dhënave ekonomike Regiodata , duke krahasuar të dhënat nga 19 vende

KEYSTONE

Gjatë vitit 2016, zviceranët kanë shpenzuar para në shoping përmes internetit mesatarisht rreth 1100 franga për person. Me këtë shumë, ata zënë vendin e dytë në Evropë, menjëherë pas britanikëve. Këta të fundit kanë shpenzuar mesatarisht nga 100 franga më tepër se zviceranët në online shoping, shkruan srf.ch. Pas britanikëbe vijnë në radhë norvegjezët.

Këto të dhëna i ka nxjerrë një studim krahasimtar që e ka bërë ofertuesi i të dhënave ekonomike Regiodata , duke krahasuar të dhënat nga 19 vende, transmeton albinfo.ch. Në shumat e përmendura nuk llogariten shpenzimet për pagesa të udhëtimeve turistike por vetëm ato për blerje gjësendesh online.

Në mesin e vendeve të krahasuara, më së paku para japin njerëzit në Turqi dhe ata në Rusi. Ata gjatë vitit 2016 për blerje online kanë shpenzuar mesatarisht vetëm nga 70 euro.

Sa i përket Britanisë së Madhe, sipas autorëve të studimit, ajo zë vendin e parë falë pjesëmarrjes së lartë të blerjes online të artikujve ushqimorë.