Stadiumi i Prishtinës peng i bllokadës politike

Renovimi i plotë i Stadiumit të Qytetit në Prishtinë  mund të vonohet në rast se bllokada politike në Kosovë do të vazhdojë, konsiderojnë përfaqësuesit e Federatës kosovare të Futbollit

Bllokada politike në Kosovë e cilat është manifestuar me ngecjeve në zhvillimin ekonomik dhe në atë integrues, ka lënë pasoja edhe në sportin kosovar. Renovimi i plotë i Stadiumit të Qytetit në Prishtinë  mund të vonohet në rast se bllokada politike në Kosovë do të vazhdojë, konsiderojnë përfaqësuesit e Federatës kosovare të Futbollit.

Në ditën kur presidenti i UEFA-s, Aleksander Çeferin, e vizitoi Kosovën (një ditë më parë), zyrtarë të lartë të Federatës së Futbollit të Kosovës thanë për BIRN se janë në pritje të formimit të qeverisë së re në mënyrë që të kryhen pagesat e nevojshme për renovimin e këtij stadiumi.

Sipas Eroll Salihut, sekretar i përgjithshëm i FFK-së, këto pagesa nuk mund të urdhërohen pa u formuar qeveria.

“Duhet të alokohen fonde të reja nga qeveria, por këto fonde nuk mund të bëhen pa u formuar qeveria e re”, tha Salihu.

Kosova ende nuk e ka një stadium që plotëson kriteret e UEFA-s prandaj ekipi kombëtar i Kosovës në futboll ndeshjet si vendas deri më tani i ka zhvilluar në stadiume të Shqipërisë. Një stadium në Mitrovicë i cili është përgatitur për ndeshje të tilla, nga UEFA po vlerësohet i papërshtatshëm për shkak të brengave të tyre në çështje të sigurisë.

Salihu pret që kjo gjendje të vazhdojë deri në muajt e parë të vitit të ardhshëm. “Presim që stadiumi (i Prishtinës) të jetë gati deri në prill të vitit të ardhshëm. Janë ende disa punë që duhet bërë”, tha Eroll Salihu.