Nesër varroset Bajram Rexhepi, Thaçi shpall të marten ditë zie

Me vendim të presidentit Thaçi, flamujt shtetëror ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit. Rexhepi varroset në Shipol të Mitrovicës me nderime shtetërore

Presidenti i Kosovës, Hashim Thaçi, ka shpallur të martën, 22 gusht 2017, ditë zie në Kosovë, në nderim të ish-kryeministrit të Kosovës, Bajram Rexhepi, që ndërroi jetë sot në Turqi pas një sëmundje të rëndë.

“Në shenjë respekti shtetëror dhe qytetar, dita e martë, 22 gusht 2017, shpallet ditë zie shtetërore në Republikën e Kosovës, pas vdekjes të Dr. Bajram Rexhepi, veteran i UÇK –së, ish kryetar i Komunës së Mitrovicës, ish kryeministër i Kosovës, ish ministër i Punëve të Brendshme, ish deputet i Republikës së Kosovës dhe kirurg”, thuhet ndër tjerash në vendimin e presidentit Thaçi.

Me vendim të presidentit Thaçi, flamujt shtetëror ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit.

Ish kryeministri Bajram Rexhepi varroset nesër në varrezat e Shipolit në Mitrovicë. Nën patronatin e Kryeministrit të Kosovës, Isa Mustafa është formuar Komisioni i Veçantë për organizimin e ceremonisë mortore. Ky komision publikon agjendën e ceremonisë mortore.

08:30 – Arritja e Arkivolit në Aeroportin Ndërkombëtar “Adem Jashari”
10:00-12:00- Homazhe në Hollin e Kuvendit të Republikës së Kosovës, në Prishtinë
12:00–12:30- Mbledhje Komemorative në Teatrin Kombëtar, në Prishtinë
(13:30 deri në 14:45 arkivoli qëndron në shtëpi të të ndjerit, në Suhodoll)
15:00-16:00- Homazhe në Kuvendin Komunal të Mitrovicës, në Mitrovicë
16:00- Nisja e Arkivolit nga Kuvendi Komunal i Mitrovicës për te varrezat në Shipol
16:30 – Ceremonia e varrimit