Moszbardhja e fatit të të pagjeturve e bën të pamundur pajtimin me Serbinë

Foto: Zyra e Kryeministrit të Kosovës

Dita Ndërkombëtare e Personave të Pagjetur është shënuar me shumë aktivitete në Kosovë. 18 balona janë lëshuar në ajër duke simbolizuar 18 vjet pritjeje për zbardhjen e fatit të personave të pagjetur gjatë luftës në Kosovës, transmeton albinfo.ch.

Familjarët këtë herë ka drejtuar ultimatumin e fundit për institucionet vendore e ndërkombëtare që kësaj çështjeje t’i gjendet zgjidhja deri në fundvit. Bajram Qerkini, nga Qendra Burimore për të Zhdukurit, ka thënë se ka ardhur koha që institucionet ta këpusin fijen e neglizhencës për zbardhjen e fatit të tyre.

Ai ka folur edhe për faktin se institucionet e drejtësisë nuk e kanë ngritur asnjë kallëzim penal, pavarësisht që familjarët kanë deponuar me qindra dokumente për vrasësit e familjarëve të tyre.  Presidenti i vendit, Hashim Thaçi, u ka bërë thirrje institucioneve përgjegjëse që të angazhohen për rastin e të pagjeturve.

Ndërkaq, kryeministri Mustafa, duke vënë kurora lulesh te lapidari në kujtim të atyre që u zhdukën gjatë luftës, ka kërkuar hapjen e dosjeve nga Serbia për të zbardhur fatin e të pagjeturve.  

Angazhim maksimal për këtë çështje ka premtuar edhe kandidatit i  PAN-it për kryeministër, Ramush Haradinaj.

Ndërsa, Albin Kurti ka thënë se moszbardhja e fatit të të pagjeturve e bën të pamundur pajtimin dhe një fillim të ri të marrëdhënieve Kosovë-Serbi.