Sulmohet hetuesi i EULEX-it

Sot, rreth orës 11 para dite është sulmuar në Prishtinë një hetues i EULEX-it. Ndaj tij është shtënë me armë zjarri derisa po lëvizte me makinën e tij zyrtare. Sipas informatave jozyrtare që kanë dhënë mediet e Prishtinës, zyrtari i sulmuar është shefi i hetimeve dhe operacioneve, amerikani James Albrecht. 

Zëdhënësja e EULEX-it Kristina Herodes ka bërë të ditur se sulmi është bërë ndaj një zyrtari të lartë të misionit, por pa dhënë detaje tjera. Sipas saj, pista e parë e hetimeve çon në dyshimin se bëhet fjalë për një sulm të planifikuar, mirëpo theksoi se rrethanat janë ende të paqarta.

Policia ka dalë në vendin e ngjarjes dhe është duke hetuar rastin. Policia e Kosovës dhe ajo e EULEX-it, kanë bllokuar të gjitha lëvizjet dhe ende nuk ka informacione nëse dikush është arrestuar.