800 veta preken nga kanceri për një vit në Kosovë

Sipas të dhënave të Institutit Onkologjik, brenda një viti në Kosovë preken me lloje të ndryshme të kancerit, rreth 800 persona

Me gjithë përpjekjet e institucioneve dhe fushatave të shumta që janë bërë në Institutin Onkologjik në Qendrën Klinike Universitare të Kosovës njoftojnë se në gjashtëmujorin e parë të këtij viti në Kosovë, janë paraqitur rreth  160 raste të reja me kancer në gji, që është për rreth 20 raste më shumë se një vit më parë.

Po sipas të dhënave të Institutit Onkologjik, brenda një viti në Kosovë preken me lloje të ndryshme të kancerit, rreth 800 persona.

Drejtori i këtij Instituti, Ekrem Hyseni ka thënë për Radion Evropa e Lirë se kjo gjendje nuk paraqet një rritje reale të numrit të të prekurve me kancer të gjirit. “Pothuajse çdo vit rritet numri i të prekurve me kancer, por që më shumë është rreth asaj se tani kemi zbulim të hershëm dhe ka një rritje të efikasitetit të pajisjeve, pastaj është edhe sensibilizimi e të tjera. Kështu që mendoj se nuk paraqet shqetësim kjo rritje”, thotë Hyseni, përcjell albinfo.ch.

Patologët në Kosovë thonë se vendet e zhvilluara kanë programe të posaçme për parandalim e kësaj sëmundje. Kjo bën që vdekshmëria e të prekurve me kancer të jetë 30 për qind, krahasuar me 70 për qind sa e kanë vendet e pazhvilluara dhe me buxhet të ulët.