Gjithçka gati për festivalin e fëmijëve “Ylberi i Prishtinës”

Përpos ansambleve vendore, pjesëmarrës do të jenë edhe ansamblet nga Shqipëria, Mali i Zi, Maqedonia, Kroacia, Bullgaria dhe Turqia

Një nga ngjarjet më të rëndësishme kulturore për fëmijë që zhvillohet në Prishtinë, festivali ndërkombëtar tradicional i valleve folklorike për fëmijë “Ylberi i Prishtinës” këtë vit ka mbushur 15-vjetorin e saj.

“Për dy ditë me radhë, më 9 dhe 10 shtator, do të defilojnë mbi 500 fëmijë nën tingujt e muzikës me veshjet tradicionale kombëtare duke prezantuar vlerat kulturore përmes valleve të ndryshme të qyteteve dhe shteteve që përfaqësojnë”, thuhet në njoftimin e Komunës së Prishtinës.

Në këtë vit do të marr pjesë disa ansamble nga vendet e rajonit. “Këtë vit do ketë shumë risi me qëllim që ky manifestim të lë mbresa të veçanta tek qytetarët e posaçërisht tek fëmijët. Përpos ansambleve vendore, pjesëmarrës do të jenë edhe ansamblet nga Shqipëria, Mali i Zi, Maqedonia, Kroacia, Bullgaria dhe Turqia”, njofton komuna e Prishtinës, përcjell albinfo.ch.

Festivali organizohet nën patronatin e Kryetarit të Komunës së Prishtinës, Shpend Ahmeti, realizohet nga Qendra Kulturore e Fëmijëve të Prishtinës dhe mbështetet nga Drejtoria për Kulturë e Komunës së Prishtinës.