Kapet një kamion me 51 refugjatë të trafikuar irakianë

Shoferi i kamionit është nga Turqia, vend ky në të cilin ka qenë i regjistruar edhe kamioni

Policia Federale e Gjermanisë ka ndaluar sot një kamion në të cilin ndodheshin 51 njerëz, refugjatë të trafikuar. Kamioni është ndaluar në autostradë, në afërsi të kufirit në mes të Gjermanisë dhe Polonisë, shkruan deutschlandrundfunk.de dhe mediat tjera gjermane.

Në mesin e të trafikuarve ishin edhe 17 fëmijë, njofton policia.

Sipas njohurive të para, personat e kapur në këtë transport ilegal u takojnë disa familjeve, të gjithë me shtetësi irakiane, transmeton albinfo.ch. Kjo është konstatuar nga deklarimet e tyre ndërsa dokumente për të argumentuar një gjë të tillë, ata nuk kanë ofruar. Ndërsa shoferi i kamionit është nga Turqia, vend ky në të cilin ka qenë i regjistruar edhe kamioni.

Ky i fundit, një 46 vjeçar, është arrestuar përkohësisht, njofton policia. Ndërsa personat e trafikuar janë marrë në paraburgim dhe në përkujdesje të autoriteteve përgjegjëse.