Mitrovica shënon Ditën Botërore të Zemrës

Edhe këtë vit kryeinfermierja e Qendrës Komunale të Mjekësisë Familjare  në Mitrovicë, Rukije Pllana në bashkëpunim me infermieret e edukimit, kanë organizuar aktivitetin tradicional për ngritjen e vetëdijes së qytetarëve për sëmundjet kardiovaskulare

Sëmundjet kardiovaskulare janë shkaktari kryesor i vdekjeve në nivel global, prandaj me rastin e Ditës Botërore të Zemrës, edhe këtë vit kryeinfermierja e Qendrës Komunale të Mjekësisë Familjare  në Mitrovicë, Rukije Pllana në bashkëpunim me infermieret e edukimit, kanë organizuar aktivitetin tradicional për ngritjen e vetëdijes së qytetarëve për sëmundjet kardiovaskulare.

Për ta përcjell aktivitetin ishte e pranishme edhe drejtoresha e Shëndetësisë, Vlora Haxhimehmedi, e cila falënderoi kryeinfermieren Pllana për organizimin e këtij aktiviteti.

Ajo e vlerësoi lartë angazhimin e tyre për qytetarët e Mitrovicës, në mënyrë që të vetëdijesohen më shumë për sëmundjet kardiovaskulare, prandaj edhe i sugjeroj qytetarët që t’i ndjekin këshillat mjekësore në mënyrë që jeta e tyre të jetë sa më e shëndetshme.

Në afërsi të QKMF-së ishte i vendosur punkti për të bërë kontrolle falas për qytetarët, ku fillimisht është bërë matja e shtypjes së gjakut si dhe matja e peshës trupore, ne raste të caktuara qytetarët edhe janë udhëzuar për konsultime me mjekët, thuhet në njoftim.

Në anën tjetër kryeinfermierja Pllana, theksoj se vetëm në këtë mënyrë qytetarët do të mund të informohen mbi sëmundjet kardiovaskulare dhe shëndetin në përgjithësi, sepse për një zemër të shëndetshme fillimisht duhet të jeni të kujdesshëm me ushqimin dhe të bëhen sa më shumë aktivitete fizike.

“Qëllimi kryesor i këtij organizimi është sensibilizimi i popullatës mbi sëmundjet kardiovaskulare, si dhe shpërndarja e broshurave  me material propagandues për ruajtjen e shëndetit”, theksoi Pllana.