25 mijë kosovarë punojnë nëpër kompanitë amerikane

Kompanitë amerikane që operojnë në Kosovë marrin mbështetjen e Ramush Haradinaj. Këto kompani kanë të punësuar 25 mijë kosovarë, ndërsa qarkullimi vjetor i tyre është rreth 2.5 miliardë euro  

Më shumë se 25 mijë kosovarë punojnë nëpër kompanitë amerikanë që janë të akredituara në Kosovë, ndërsa qarkullimi i mjeteve të këtyre kompanive sillet rreth 2.5 miliard euro. Kështu u tha sot në një takim që kryeministri i Kosovës, Ramush Haradinaj zhvilloi me përfaqësuesit e disa prej kompanive amerikane që operojnë në Kosovë dhe që janë nën ombrellën e Odës Ekonomike Amerikane të Kosovës.

Haradinaj këtyre bizneseve u ofroi mbështetje institucionale.

Kryeministri Haradinaj ka përgëzuar iniciativën e Odës Ekonomike Amerikane në Kosovë, e cila është gjithashtu anëtare e Këshillit Evropian të Odave Ekonomike Amerikane, dhe e cila ofron një marrëdhënie të drejtpërdrejtë, rritje të bizneseve të vogla dhe të mesme amerikane si dhe atyre evropiane.

Në këtë takim u diskutuan disa nga temat kryesore me anë të të cilave do të hapej rrugë për zhvillim ekonomik, investime të reja si dhe rritje buxhetore: gjyqësor funksional dhe të besueshëm, ngritja e kapaciteteve njerëzore, mbrojtja e prodhimit, kontrolli i kualitetit në të gjitha produktet, nismat për reforma ligjore në fusha të ndryshme, si dhe nevoja e sigurimit me furnizim stabil me energji elektrike në Kosovë.

Në takim u arrit pajtueshmëri që themelimi i Ministrisë së Inovacionit dhe Ndërmarrësisë ishte shumë e nevojshme, duke i ofruar rinisë së Kosovës mundësinë që të jenë pjesë e zhvillimit si pjesa tjetër e botës. Oda Ekonomike Amerikane i dorëzoi kryeministrit Haradinaj një dokument me rekomandime konkrete për zhvillimin e sektorit privat në Kosovë.

Kryeministri falënderoi Odën Ekonomike Amerikane për iniciativën e tyre dhe theksoi se do të fokusohet në inkurajimin e tregtisë dhe prodhimit, si dhe investimeve.  Kryeministri i ftoi për partneritet të mëtutjeshëm  dhe i siguroi mbështetje të plotë nga ana e tij.

Në takim ishin të pranishëm edhe ministri i Financave, ministri i Zhvillimit Ekonomik, ministri i Tregtisë dhe Industrisë dhe ministrja e Mjedisit dhe Planifikimit Hapësinor.