Vjenë: Startup-i austriako-shqiptar siguron 3.6 milionë dollarë investim për platformën e dizajnit me AI

Startup-i austriako-shqiptar me bazë në Vjenë numëron 60 mijë përdorues dhe qindra klientë pagues, ndërsa versioni i plotë pritet në verën e 2026

Startup-i austriako-shqiptar Synaps, i fokusuar në dizajnin dhe arkitekturën me inteligjencë artificiale, ka siguruar një investim prej 3.6 milionë dollarësh në fazën pre-seed, duke synuar të ndërtojë një platformë të re që mund të sfidojë gjigantët e industrisë si AutoCAD, transmeton Albinfo.at.

Synaps, me seli në Vjenë dhe i themeluar nga tre sipërmarrës me origjinë shqiptare, u lansua në version beta në nëntor të vitit 2025 në Tiranë, në një event ku morën pjesë arkitektë të njohur ndërkombëtarisht dhe kryeministri i Shqipërisë, Edi Rama.

Vetëm pesë muaj pas këtij lansimi, kompania ka njoftuar se ka arritur 60 mijë përdorues, rreth 1,500 përdorues aktivë çdo ditë dhe qindra klientë që paguajnë, edhe pse produkti ndodhet ende në fazën beta.

Investimi prej 3.6 milionë dollarësh është siguruar nga akseleratori dhe fondi amerikan Plug and Play, si dhe nga fondi Fil Rouge Capital me bazë në Zagreb. Sipas kompanisë, qëllimi i këtij financimi është përshpejtimi i zhvillimit të platformës dhe përgatitja për lansimin e versionit të parë të plotë.

CEO i Synaps, Brendon Ahmeti, ka theksuar se strategjia e kompanisë ka qenë të dëshmojë rezultate reale dhe të fitojë besueshmëri në treg, duke ndërtuar një produkt të orientuar plotësisht drejt inteligjencës artificiale.

Synaps e përshkruan veten si një kombinim mes platformës Figma dhe qasjeve të reja të dizajnit me përshkrime në gjuhë natyrore, duke e quajtur këtë metodë “vibe designing”. Produkti kryesor bazohet në teknologjinë Vecy AI, e cila gjeneron plane arkitekturore në formë vektoriale dhe synon të reduktojë ndjeshëm numrin e komandave teknike, duke e përshpejtuar procesin e vizatimit krahasuar me mjetet tradicionale.

Kompania pretendon se motori i renderimit për outpute 2D, 3D dhe video mund të jetë deri në 1000 herë më i shpejtë se zgjidhjet aktuale në treg, varësisht nga kompleksiteti i projektit, megjithëse këto të dhëna nuk janë verifikuar në mënyrë të pavarur.

Synaps synon të sfidojë tregun e dominuar nga Autodesk, ku AutoCAD zotëron rreth 39% të tregut global të software-ve CAD. Sipas kompanisë, platformat ekzistuese janë ndërtuar për një epokë para bashkëpunimit dhe para inteligjencës artificiale, ndërsa Synaps synon të sjellë një ambient të vetëm pune, bashkëpunim në kohë reale dhe dizajn të udhëhequr nga inpute të thjeshta.

Rritja e Synaps është mbështetur edhe nga prania në rrjete sociale, ku kompania ka arritur mbi 10 milionë shikime në YouTube, Instagram dhe LinkedIn. Ndërkohë, ekipi është zgjeruar nga 4 në 17 persona dhe është hapur edhe një zyrë në San Francisko, duke intensifikuar praninë në tregun amerikan.

Sipas Synaps, disa nga zyrat më të mëdha arkitekturore në botë kanë testuar platformën, ndërsa kompania ka marrë komente edhe nga emra të njohur të arkitekturës globale.

Versioni i parë i plotë i platformës pritet të lançohet në verën e vitit 2026, ndërsa kompania synon të arrijë deri në 300 mijë përdorues deri në fund të vitit. Synaps parashikon gjithashtu një raund të ri investimi në fund të vitit 2026, në fazën seed, me fokus zgjerimin në SHBA dhe zhvillimin e mëtejshëm të produktit.

Synaps synon një treg shumë më të gjerë se vetëm firmat arkitekturore, duke vlerësuar se në botë ka rreth 200 milionë profesionistë që merren me vizatim teknik dhe që shpenzojnë pjesën më të madhe të kohës në procese vizatimi dhe renderimi – procese që kjo platformë synon t’i transformojë përmes inteligjencës artificiale./Albinfo.at

---