Vendet e BE-së pranojnë 25 mijë emigrantë nga Afrika dhe Lindja e Mesme

"Ofrimi i rrugëve të ligjshme eliminon nevojën që njerëzit të rrezikojnë jetën e tyre dhe të mbesin në duart e kontrabandistëve"

Shtetet anëtare të BE-së janë zotuar të pranojnë 25 mijë refugjatë direkt nga Afrika dhe Lindja e Mesme gjatë dy vjetëve të ardhshme. Këtë e deklaroi komisari i BE-së për migracionin, Dimitris Avramopulos në Luksemburg, ku u mbajt një takim i ministrave të brendshëm të BE-së.

“Ofrimi i rrugëve të ligjshme eliminon nevojën që njerëzit të rrezikojnë jetën e tyre dhe të mbesin në duart e kontrabandistëve”, tha Avramopoulos, transmeton albinfo.ch.

Komisioni Evropian ka vendosur objektivin në dy vjetët e ardhshme për të gjetur një alternativë “të sigurt dhe ligjore” për kalimin e rrezikshëm të Mesdheut, duke pranuar 50,000 refugjatë.

Në kontrast me zhvendosjen e kontestuar të azilkërkuesve nga Italia dhe Greqia, të përcaktuara me kuota të detyrueshme, këtë herë pritja e refugjatëve do të jetë në baza vullnetare. KE ka rezervuar 500 milionë euro për vendet që duan të ndihmojnë, që është 10,000 euro për person.