Kosova shpall listën me tri risi

Bëhet fjalë për portierin Faton Maloku dhe dy futbollistët tjera, Armend Thaçi dhe Suad Sahiti

Përzgjedhësi i Kosovës, Muharrem Sahiti ka shpallur listën e futbollistëve të ftuar për ndeshjen miqësore kundër Letonisë që zhvillohet në “Adem Jashari” në Mitrovicë, më 13 nëntor, shkruan albinfo.ch.

Në këtë listë janë tre futbollistë të ri që janë ftuar për herë të parë. Bëhet fjalë për portierin Faton Maloku dhe dy futbollistët tjera, Armend Thaçi dhe Suad Sahiti.

Përzgjedhësi ka thënë se duhet të luajmë lojë sulmuese për të fituar. “Duhet të jetë një lojë sulmuese nëse dëshirojmë fitoren. Jemi orientuar për një mënyrë të lojës. Nuk mund që në futboll të bëhen ndryshime të përnjëhershme, por duhet ta shfrytëzojmë motivin pasi luajmë përballë shikuesve tanë. Por, do të jemi më ofensiv”, ka thënë Sahiti.

Kjo ndeshje do të jetë e veçantë për Valon Berishën.

“Nuk ka më mirë se sa të luash në vendin tënd. Mezi po pres të vjen dita e hënë. Kjo ndeshje është e vështirë dhe çdo përfaqësuese është e fortë. Besoj se me përgatitje dhe përkrahje do ta luajmë një lojë të mirë”, u shpreh Berisha.

Lista e plotë:

Portierë: Samir Ujkani, Bledar Hajdini dhe Faton Maloku.

Mbrojtës: Amir Rrahmani, Mërgim Vojvoda, Altin Dallku, Fidan Haliti, Lirik Kastrati dhe Armend Thaçi.

Mesfushorë: Hekuran Kryeziu, Bernard Berisha, Besar Musolli, Besar Halimi, Valon Berisha, Milot Rashica dhe Suad Sahiti.

Sulmues: Elbasan Rashani, Atdhe Nuhiu dhe Vedat Muriqi.